ماخلص ثالث يوم عيد و هجدوا الناس و خلصوا تسليماتهم و تمطيخاتهم و بلعوا حلاوهم
حدث مالم يكن بالحسبان
كان يونس توه مصادق ولد الإمام من يومين, ( اظاهر صادفه يوم في الحارة و سلم عليه و قاله
وش اخبارك ؟ ونشب فيه أخوي يحسبه صار صديقه , و صار يسابق الامام على المسجد الله يرحم ايام الشخير و جمع الصلوات سبحان مغير الاحوال )
المهم و يجي ذاك اليوم الاغبر, اللي طلع فيه يونس يراكض بيلحق على الصلاة قبل لا يأذن الأمام )
وفيما هو يراكض في الحوش بيطلع الا وتنقز بوجه قطوة مهبولة اظاهر مندسة بكرتون ولاشي
لانها فجعته من قلب ,, و صرخ صرخة ولا صرخة بطلة Scream
اللي يسمع صوت الصرخة مستحيل يقول ذا ولد ,, ماادري مع الروعة اظاهر ضربت عنده
الهرمونات ولا طلع عنده طبقة جديدة في الحبال الصوتية
كانت صرخته الله يصلحه مدوية ومفزعة ومتجلجلة ومتقلقلة تقلقت و تجلجلت و تقربعت في أرجاء الحارة
كلها
لدرجة حسبت طايحة عليه هيلكوبتر من السماء
ولا انفجر تحته بركان
و جيت اركض اشوف وش فيه ولقيته يهاوش القطوة
بغيت اقوله سلامات , بس قلت خليها مستورة مايحتاج يدري اني سمعت صرخته العملاقة
خليته و طلع للمسجد
رجع هو وابوي عقب الصلاة و جالسين يسولفون
الا يسأله أبوي وش قاعد تهذر على ولد الامام وتقوله مافينا شيء
عسى ماشر
يونس : هوو بس سألني يقول اني مار من بيتكم وسمعت صوت حرمة تصارخ , عسى مااحد صار
له شيء ؟
و قلت له لا الحمدالله مافينا شيء , هذي أختي بس صرخت
وقالي سلامات ماتشوف شر, وقلت له لا مافيها شيء, هي بس كذا صرخت وسكتت
أنا >>
والحمدالله قبل مااستوعب دباشة رده هو وصرخته المخيسة اللي لطها فيني
قام عليه ابوي ولعن ابليسه
قلت لابوي الله يعافيك رقع الموضوع , لا يقولون بنتهم مهبولة
عارفة ولد امامنا الله يصلحه بثر و ملقوف و يحب الهذر كأنه عجوز بالعه رادو
وصرفني قالي الموضوع مايسوى و الولد بزر من طقة يونس , مهوب جايب خبر
..
ويجي بكرة واول مادخل أبوي المسجد , يجيه الامام ويمسكه على جنب
: ياابو يونس ,, تراني اقرأ على الناس و أرقيهم , و ترى بنتك مثل بنتي
ابد اقرأ عليها كم يوم و تعقل ان شاءالله و تهجد <<
......
يعني بفهم لمتى وانا أشيل فشايل غيري , هو يصرخ صرخة زي وجهه
انا وشدخل أهلي !!
طيب لو بعدي هالمرة وأقول أخوي دبشة و مسبوه ,,, وشلون أعدي المرات
اللي راحوا
ياما وياما
بنت خالتي تطس لسوق من ورى اهلها ., وتلطها فيني ,,أخت يونس قايلة مريني
منيرة تغش من سلطانة و اتهزأ أنا !!
امي تنعزم على عزيمة ,, ماتبي تروح ,, هاه والله بنتي مابلغتني
أبوي نسى يجيب المقاضي ,, اطلع انا السبب
حتى السواق ينقلع للبطحا بسيارتنا , ندق عليه .. نسأله وينك ؟!
انا فيه ودي أخت يونس مملكة
والمشكلة أكون انا اللي داقة اسأله وينه
يعني أنا بفهم شيء واحد ليه فيه ناس كأنهم نعام, يسوون الشيء ويستحون منه ويلزقونه بغيرهم
( حتى النعام أرحم منهم , عالأقل يدس راسه بالتراب وينطم مايلصق فشايله بغيره )
صدق يعني ماعانيتوا من هالنعامات ؟؟
من هالفئة من الناس اللي يشكلون خليط من الذراقة و البجاحة
هذي تساؤلاتي وغبّناتي و انفعالاتي
دمتم بووود .. منقول